ಆರು ವರ್ಷಗಳ ಸಂಶೋಧನೆಯ ಫಲ ‘ಪತ್ತೇದಾರಿ’! ಕ್ರೈಂ ಥ್ರಿಲ್ಲರ್ ಚಿತ್ರಕ್ಕೆ ನವೀನ್ ಶಂಕರ್ ಚಾಲನೆ!
ನಾಯಕನಾಗಿ, ನಿರ್ಮಾಪಕನಾಗಿಯೂ ಮೊಹಮ್ಮದ್ ಕಿಜಾರ್ ಜವಾಬ್ದಾರಿ – ತುಕಾಲಿ ಸಂತೋಷ್ ಪೊಲೀಸ್ ಪಾತ್ರದಲ್ಲಿ ವಿಶೇಷ ಆಕರ್ಷಣೆ!ಕ್ರೈಂ ಥ್ರಿಲ್ಲರ್ ಚಿತ್ರಗಳ ಸಾಲಿಗೆ ಮತ್ತೊಂದು ಕುತೂಹಲಕಾರಿ ಪ್ರಯತ್ನ ಸೇರ್ಪಡೆಯಾಗುತ್ತಿದೆ. ಅದೇ ಶ್ರೀನಿವಾಸ್ ಜಯರಾಮ್ ನಿರ್ದೇಶನದ ‘ಪತ್ತೇದಾರಿ’. ಹೆಸರಿನಲ್ಲೇ ತನಿಖೆಯ ಸುಳಿವು ನೀಡುವ ಈ ಚಿತ್ರದ ಮುಹೂರ್ತ ಸಮಾರಂಭ ಬೆಂಗಳೂರಿನ ಕಂಠೀರವ ಸ್ಟುಡಿಯೋದಲ್ಲಿ ನೆರವೇರಿದ್ದು, ನಟ ನವೀನ್ ಶಂಕರ್ ಪ್ರಥಮ ಸನ್ನಿವೇಶಕ್ಕೆ ಆರಂಭ ಫಲಕ ತೋರಿಸುವ ಮೂಲಕ ಚಿತ್ರತಂಡದ ಪಯಣಕ್ಕೆ ಚಾಲನೆ ನೀಡಿದರು.
ಈಗಾಗಲೇ ಕ್ರೈಂ ಥ್ರಿಲ್ಲರ್ ಕಥೆಗಳನ್ನು ಪ್ರೇಕ್ಷಕರು ಸಾಕಷ್ಟು ನೋಡಿದ್ದಾರೆ. ಹೀಗಿರುವಾಗ ಅದೇ ಜಾನರ್‌ನಲ್ಲಿ ಹೊಸತನವನ್ನು ಕಟ್ಟಿಕೊಡುವುದು ನಿರ್ದೇಶಕರ ಮುಂದಿರುವ ಸವಾಲು.
ಈ ಸವಾಲನ್ನು ಸ್ವೀಕರಿಸಿರುವ ನಿರ್ದೇಶಕ ಶ್ರೀನಿವಾಸ್ ಜಯರಾಮ್, ಚಿತ್ರದ ಕಥೆ ಮತ್ತು ಚಿತ್ರಕಥೆಗಾಗಿ ಬರೋಬ್ಬರಿ ಆರು ವರ್ಷಗಳ ಕಾಲ ಸಂಶೋಧನೆ ನಡೆಸಿರುವುದಾಗಿ ತಿಳಿಸಿದ್ದಾರೆ.ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕ್ರೈಂ ಥ್ರಿಲ್ಲರ್ ಎಂದಾಕ್ಷಣ ಸಸ್ಪೆನ್ಸ್ ಮಾತ್ರವಲ್ಲ, ನಿರೂಪಣೆಯಲ್ಲಿಯೂ ವಿಭಿನ್ನತೆ ಇರಬೇಕು. ಅದಕ್ಕಾಗಿ ಸಾಕಷ್ಟು ಅಧ್ಯಯನ ನಡೆಸಿ ಕಥೆಯನ್ನು ರೂಪಿಸಿದ್ದೇವೆ.
ಅನುಭವಿ ತಂತ್ರಜ್ಞರು ಹಾಗೂ ಕಲಾವಿದರ ಸಹಕಾರದೊಂದಿಗೆ ಪ್ರತಿಯೊಂದು ವಿಭಾಗದಲ್ಲೂ ಗುಣಮಟ್ಟಕ್ಕೆ ಆದ್ಯತೆ ನೀಡುತ್ತಿದ್ದೇವೆ. ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸುವ ಉತ್ತಮ ಚಿತ್ರ ನೀಡುವ ವಿಶ್ವಾಸವಿದೆ ಎಂದು ಹೇಳಿದರು.ನಾಯಕನ ಜತೆಗೆ ನಿರ್ಮಾಪಕನ ಹೊಣೆಗಾರಿಕೆಯೂ ಕಿಜಾರ್ ಹೆಗಲಿಗೆ‘ಪತ್ತೇದಾರಿ’ ಚಿತ್ರದ ನಾಯಕ ಮೊಹಮ್ಮದ್ ಕಿಜಾರ್ ಅವರ ಪಾಲಿಗೆ ಇದು ವಿಶೇಷ ಸಿನಿಮಾ.
ಏಕೆಂದರೆ ನಾಯಕನಾಗಿ ಅಭಿನಯಿಸುವುದರ ಜತೆಗೆ ನಿರ್ಮಾಣದ ಜವಾಬ್ದಾರಿಯನ್ನೂ ಅವರೇ ಹೊತ್ತಿದ್ದಾರೆ. ನಿರ್ದೇಶಕರು ಹೇಳಿದ ಕಥೆ ಹಾಗೂ ತಮ್ಮ ಪಾತ್ರದ ವಿಭಿನ್ನತೆ ಚಿತ್ರದಲ್ಲಿ ಅಭಿನಯಿಸಲು ಪ್ರೇರಣೆಯಾಯಿತು. ಇಡೀ ತಂಡದ ಸಹಕಾರದಿಂದ ಉತ್ತಮ ಸಿನಿಮಾ ಮೂಡಿಬರುವ ನಿರೀಕ್ಷೆಯಿದೆ. ಪ್ರೇಕ್ಷಕರು ಮತ್ತು ಮಾಧ್ಯಮದವರ ಬೆಂಬಲ ಇರಲಿ ಎಂದು ಮನವಿ ಮಾಡಿಕೊಂಡರು.
ಸಸ್ಪೆನ್ಸ್ ನಡುವೆ ನಗುವಿನ ಕಚಗುಳಿ ಇಡಲಿರುವ ತುಕಾಲಿ ಸಂತೋಷ್ ಚಿತ್ರದ ಮತ್ತೊಂದು ಗಮನ ಸೆಳೆಯುವ ಅಂಶವೆಂದರೆ ತುಕಾಲಿ ಸಂತೋಷ್ ಅವರ ಪಾತ್ರ. ಮಲಯಾಳಂ, ತೆಲುಗು, ಕನ್ನಡ ಹಾಗೂ ಹಿಂದಿ ಸಿನಿಮಾಗಳು ಮತ್ತು ವೆಬ್‌ಸೀರಿಸ್‌ಗಳನ್ನು ವೀಕ್ಷಿಸುವ ತುಕಾಲಿ ಸಂತೋಷ್ ಅವರಿಗೆ ಸಸ್ಪೆನ್ಸ್ ಹಾಗೂ ಹಾಸ್ಯ ಬೆರೆತ ಪೊಲೀಸ್ ಪಾತ್ರದಲ್ಲಿ ಕಾಣಿಸಿಕೊಳ್ಳುವ ಆಸೆಯಿತ್ತಂತೆ. ನಿರ್ದೇಶಕರು ಹೇಳಿದ ಕಥೆ ಮತ್ತು ಚಿತ್ರಕಥೆ ಇಷ್ಟವಾಗಿದ್ದು, ಚಿತ್ರದಲ್ಲಿ ಒಂದರ ಹಿಂದೆ ಮತ್ತೊಂದು ತಿರುವುಗಳು ಎದುರಾಗಲಿವೆ ಎಂದು ಅವರು ತಮ್ಮ ಪಾತ್ರದ ಬಗ್ಗೆ ಸಂತಸ ವ್ಯಕ್ತಪಡಿಸಿದರು.
ಸಹ ನಿರ್ಮಾಪಕರಾದ ಕೃಷ್ಣಪ್ಪ (ಕೆ.ಕೆ.) ಹಾಗೂ ಮಧುಸೂದನ್ ಚಿತ್ರದ ಕುರಿತು ಮಾತನಾಡಿದರು. ನಟರಾದ ಸಿದ್ದೇಶ್ ಮತ್ತು ಸೂರಜ್ ಕೂಡ ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡರು.
ತಂತ್ರಜ್ಞರ ಬಳಗದಲ್ಲಿ ಅನುಭವಿಗಳ ತಂಡಮೊಹಮ್ಮದ್ ಅತೀಕ್ ಚಿತ್ರದ ನಿರ್ಮಾಪಕರಾಗಿದ್ದು, ಮಧುಸೂದನ್ ಟಿ.ವಿ. ಹಾಗೂ ಟಿ. ಕೃಷ್ಣಪ್ಪ (ಕೆ.ಕೆ.) ಸಹ ನಿರ್ಮಾಪಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.ಹಾಲೇಶ್ ಛಾಯಾಗ್ರಹಣ, ರಾಘವೇಂದ್ರ ಸಂಗೀತ, ಕೆ. ರವಿವರ್ಮ ಮತ್ತು ನರಸಿಂಹ ಸಾಹಸ ನಿರ್ದೇಶನ, ರಘು ನಿಡವಳ್ಳಿ ಸಂಭಾಷಣೆ ಹಾಗೂ ಕೆ.ಎಂ. ಪ್ರಕಾಶ್ ಸಂಕಲನದ ಜವಾಬ್ದಾರಿ ನಿರ್ವಹಿಸುತ್ತಿದ್ದಾರೆ. ಪ್ರಶಾಂತ್ ಕಲಾ ನಿರ್ದೇಶನ ಮತ್ತು ದಯಾನಂದ್ ವಸ್ತ್ರಾಲಂಕಾರ ಮಾಡುತ್ತಿದ್ದಾರೆ.
ತಾರಾಬಳಗದಲ್ಲಿ ಮೊಹಮ್ಮದ್ ಕಿಜಾರ್, ರೂಪಾ, ಸಿದ್ದೇಶ್, ಕಾಕರೋಜ್ ಸುಧಿ, ತುಕಾಲಿ ಸಂತೋಷ್, ವರ್ಧನ್, ಸೂರಜ್, ಗಿರೀಶ್ ಜಟ್ಟಿ, ನಿರಂಜನ್ ಅಶ್ವತ್, ವಂದನಾ, ಶಿವಮೊಗ್ಗ ರಾಮಣ್ಣ, ಉಗ್ರಂ ವಿಜಿ, ಉಗ್ರಂ ರೆಡ್ಡಿ, ಪ್ರೇಮ ಹಾಗೂ ಮಂಡ್ಯ ಸಿದ್ದು ಸೇರಿದಂತೆ ಹಲವು ಕಲಾವಿದರು ‘ಪತ್ತೇದಾರಿ’ ಚಿತ್ರದ ತಾರಾಬಳಗದಲ್ಲಿದ್ದಾರೆ.
ಆರು ವರ್ಷಗಳ ಸಂಶೋಧನೆಯ ಹಿನ್ನೆಲೆ, ವಿಭಿನ್ನ ನಿರೂಪಣೆಯ ಭರವಸೆ, ಸಸ್ಪೆನ್ಸ್ ಜೊತೆಗೆ ಹಾಸ್ಯದ ಸ್ಪರ್ಶ ಮತ್ತು ಅನುಭವಿ ಕಲಾವಿದರ ತಂಡ… ಇವೆಲ್ಲದರೊಂದಿಗೆ ಸಿದ್ಧವಾಗುತ್ತಿರುವ ‘ಪತ್ತೇದಾರಿ’ ಪ್ರೇಕ್ಷಕರ ಮುಂದೆ ಯಾವ ರೀತಿಯ ತನಿಖಾ ಜಗತ್ತನ್ನು ತೆರೆದಿಡಲಿದೆ ಎಂಬ ಕುತೂಹಲ ಈಗಿನಿಂದಲೇ ಮೂಡಿದೆ.
