ಹತ್ತು ತಲೆಗಳ ರಾವಣನ ಆರ್ಭಟಕ್ಕೆ ಬೆರಗಾದ ಪ್ರೇಕ್ಷಕ, ತಂತ್ರಜ್ಞಾನದ ಅಬ್ಬರದಲ್ಲಿ ‘ರಾಮಾಯಣ’!

ಚಿತ್ರ ವಿಮರ್ಶೆ- ಮಂಜುರಾಜ್ ಸೂರ್ಯ
ರೇಟಿಂಗ್ — ⭐⭐⭐⭐ / 5

ಚಿತ್ರ ರಾಮಾಯಣ ಭಾಗ-1, (2026)
ನಿರ್ಮಾಪಕ: ನಮಿತ್ ಮಲ್ಹೋತ್ರಾ
ಪ್ರೈಮ್ ಫೋಕಸ್ ಸ್ಟುಡಿಯೋಸ್

ನಿರ್ದೇಶನ –  ನಿತೇಶ್ ತಿವಾರಿ

ಕಥೆ –  ವಾಲ್ಮೀಕಿ ರಾಮಾಯಣ
ಚಿತ್ರಕಥೆ –  ಶ್ರೀಧರ್ ರಾಘವನ್, ನಿತೇಶ್ ತಿವಾರಿ
ಸಂಭಾಷಣೆ – ಶ್ರೇಯಸ್ ಜೈನ್, ನಿತೇಶ್ ತಿವಾರಿ
ಛಾಯಾಗ್ರಹಣ –  ಮಹೇಶ್ ಲಿಮಯೆ, ಪಂಕಜ್ ಕುಮಾರ್
ಸಂಕಲನ –  ಹುಝೆಫಾ ಲೋಕಂಡ್ವಾಲಾ, ವಿಲಿಯಂ ಹೋಯ್
ಸಂಗೀತ –  ಹ್ಯಾನ್ಸ್ ಝಿಮ್ಮರ್, ಎ.ಆರ್. ರೆಹಮಾನ್
ಹಿನ್ನೆಲೆ ಸಂಗೀತ –  ಹ್ಯಾನ್ಸ್ ಝಿಮ್ಮರ್, ಎ.ಆರ್. ರೆಹಮಾನ್

ಕಲಾವಿದರು
ಪ್ರಮುಖ ಕಲಾವಿದರು ಮತ್ತು ಪಾತ್ರಗಳು
ಕಲಾವಿದರು                  ಪಾತ್ರ
ರಣಬೀರ್ ಕಪೂರ್     ಶ್ರೀರಾಮ
ಸಾಯಿ ಪಲ್ಲವಿ           ಸೀತೆ
ಯಶ್                      ರಾವಣ
ರವಿ ದುಬೆ                ಲಕ್ಷ್ಮಣ
ಸನ್ನಿ ಡಿಯೋಲ್       ಹನುಮಂತ
  ಅರುಣ್ ಗೋವಿಲ್      ದಶರಥ
  ಕಾಜಲ್ ಅಗರ್ವಾಲ್    ಮಂಡೋದರಿ
  ರಕುಲ್ ಪ್ರೀತ್ ಸಿಂಗ್    ಶೂರ್ಪಣಖಿ
  ಲಾರಾ ದತ್ತಾ                ಕೈಕೇಯಿ
  ಇಂದಿರಾ ಕೃಷ್ಣನ್          ಕೌಸಲ್ಯೆ
  ಶೋಭನಾ                  ಕೈಕಸಿ
  ಶೀಬಾ ಚಡ್ಡಾ              ಮಂಥರೆ
  ಸೋನಲ್ ಝಾ         ಸುಮಿತ್ರೆ
  ಅದಿನಾಥ್ ಕೊಠಾರೆ   ಭರತ
ಮುಂತಾದವರು.

ಭಾರತೀಯರ ಪಾಲಿಗೆ ರಾಮಾಯಣ ಎಂದರೆ ಕೇವಲ ಒಂದು ಕಥೆಯಲ್ಲ. ಅದು ಧರ್ಮ, ಸಂಸ್ಕೃತಿ, ನಂಬಿಕೆ, ಭಾವನೆ ಮತ್ತು ಬದುಕಿನ ಮೌಲ್ಯಗಳ ಪ್ರತಿಬಿಂಬ. ತಲೆಮಾರುಗಳಿಂದ ಕೇಳುತ್ತಾ, ಓದುತ್ತಾ, ಧಾರಾವಾಹಿಗಳಲ್ಲಿ ಹಾಗೂ ಸಿನಿಮಾಗಳಲ್ಲಿ ನೋಡುತ್ತಾ ಬಂದಿರುವ ರಾಮಾಯಣವನ್ನು ಮತ್ತೊಮ್ಮೆ ದೊಡ್ಡ ಪರದೆಯ ಮೇಲೆ ತರುವುದು ಸಾಮಾನ್ಯ ಸಾಹಸವಲ್ಲ. ಅದರಲ್ಲೂ ಈಗಾಗಲೇ ಪ್ರತಿಯೊಂದು ಪಾತ್ರದ ಹಿನ್ನೆಲೆ, ಕಥೆಯ ತಿರುವುಗಳು, ಅಂತ್ಯ ಎಲ್ಲವೂ ಬಹುತೇಕ ಪ್ರೇಕ್ಷಕರಿಗೆ ಗೊತ್ತಿರುವಾಗ ಅದೇ ಕಥೆಗೆ ಹೊಸತನದ ಸ್ಪರ್ಶ ನೀಡಿ ಕುತೂಹಲ ಉಳಿಸಿಕೊಳ್ಳುವುದು ನಿರ್ದೇಶಕನಿಗೆ ನಿಜಕ್ಕೂ ದೊಡ್ಡ ಸವಾಲು.

ಅಂತಹ ಸವಾಲನ್ನು ಸ್ವೀಕರಿಸಿರುವ ನಿರ್ದೇಶಕ ನಿತೇಶ್ ತಿವಾರಿ, ರಣಬೀರ್ ಕಪೂರ್, ಸಾಯಿ ಪಲ್ಲವಿ ಮತ್ತು ಕನ್ನಡದ ಹೆಮ್ಮೆಯ ನಟ ಯಶ್ ಅಭಿನಯದ ‘ರಾಮಾಯಣ’ ಚಿತ್ರದ ಮೂಲಕ ಮಹಾಕಾವ್ಯವನ್ನು ಮತ್ತೊಂದು ವಿಭಿನ್ನ ಸಿನಿಮಾ ಅನುಭವವಾಗಿ ಕಟ್ಟಿಕೊಡುವ ಪ್ರಯತ್ನ ಮಾಡಿದ್ದಾರೆ.
ಧಾರ್ಮಿಕ ನಂಬಿಕೆಗಳ ನಡುವೆ ಒಂದಷ್ಟು ಸಿನಿಮೀಯ ಸ್ವಾತಂತ್ರ್ಯ, ಹೊಸ ಕಲ್ಪನೆಗಳು, ಅದ್ದೂರಿ ತಂತ್ರಜ್ಞಾನ ಮತ್ತು ಕಮರ್ಷಿಯಲ್ ಆಗಿ ಎಂಟರ್ಟೈನ್ಮೆಂಟ್ ಅಂಶಗಳನ್ನು ಬೆರೆಸಿ ರೂಪಿಸಿರುವ ಈ ಚಿತ್ರದಲ್ಲಿ ಮೆಚ್ಚುಗೆಗೆ ಸಾಕಷ್ಟು ಸಂಗತಿಗಳಿವೆ. ಅದೇ ರೀತಿ ಚರ್ಚೆಗೆ ಗ್ರಾಸವಾಗುವ ಕೆಲವು ಅಂಶಗಳೂ ಇವೆ.

ದಶಾನನನ ಜನನದ ಹಿಂದಿನ ಕಥೆ; ರಾವಣನಿಗೆ ಹೊಸ ಆಯಾಮ!
ಸಾಮಾನ್ಯವಾಗಿ ರಾಮಾಯಣ ಎಂದಾಗ ನಮ್ಮ ಕಣ್ಣ ಮುಂದೆ ಬರುವುದು ರಾಮ, ಸೀತೆ, ಲಕ್ಷ್ಮಣ, ಹನುಮಂತ ಮತ್ತು ರಾವಣನ ಪಾತ್ರಗಳು. ಆದರೆ ಈ ಚಿತ್ರದಲ್ಲಿ ರಾವಣನ ಹಿನ್ನೆಲೆಗೆ ವಿಶೇಷ ಒತ್ತು ನೀಡಲಾಗಿದೆ.
ದೇವತೆಗಳಿಂದ ಶಿಕ್ಷೆಗೆ ಒಳಗಾಗಿ ಕಷ್ಟ, ಬಡತನ ಮತ್ತು ಅವಮಾನಗಳನ್ನು ಅನುಭವಿಸುವ ಕುಲದ ಯುವಕನೊಬ್ಬ ಬ್ರಹ್ಮನಿಂದ ವರವನ್ನು ಪಡೆದು ದೇವತೆಗಳ ವಿರುದ್ಧವೇ ತಿರುಗಿ ಬೀಳುವ ಕಥನದ ಮೂಲಕ ದಶಾನನನ ವ್ಯಕ್ತಿತ್ವವನ್ನು ಪರಿಚಯಿಸಲಾಗಿದೆ. ಆತನೇ ಮುಂದೆ ರಾವಣನಾಗಿ ರೂಪುಗೊಳ್ಳುತ್ತಾನೆ.
ರಾವಣನ ಬಾಲ್ಯ, ಆತನ ಬದುಕಿನ ಸನ್ನಿವೇಶಗಳು, ಶಕ್ತಿಯ ಅನ್ವೇಷಣೆ ಹಾಗೂ ವ್ಯಕ್ತಿತ್ವದ ಬೆಳವಣಿಗೆಯನ್ನು ತೆರೆಮೇಲೆ ತರುವ ಪ್ರಯತ್ನ ಹೊಸತನದಿಂದ ಕೂಡಿದೆ. ರಾವಣನನ್ನು ಕೇವಲ ರಾಮನ ಎದುರಾಳಿ ಅಥವಾ ಖಳನಾಯಕನಾಗಿ ನೋಡದೆ, ಆತನ ಹಿಂದಿನ ಬದುಕಿಗೂ ಕಥೆಯಲ್ಲಿ ಜಾಗ ನೀಡಿರುವುದು ಗಮನಾರ್ಹ.
ಅಷ್ಟೇ ಅಲ್ಲ, ಕಾಡಿನಲ್ಲಿ ಸೀತೆ ರಾಕ್ಷಸರೊಂದಿಗೆ ಹೋರಾಡುವ ಸನ್ನಿವೇಶವೂ ಹೊಸ ಕಲ್ಪನೆಯಾಗಿ ಮೂಡಿಬಂದಿದೆ. ಇಂತಹ ಕೆಲವು ಪ್ರಸಂಗಗಳು ಪರಿಚಿತ ರಾಮಾಯಣದ ಕಥನಕ್ಕೆ ವಿಭಿನ್ನ ಸ್ಪರ್ಶ ನೀಡುತ್ತವೆ.
ಆದರೆ ರಾಮಾಯಣದ ಕಥೆಯಲ್ಲಿ ರಾವಣನ ಆರ್ಭಟಕ್ಕೆ ನೀಡಿರುವ ಒತ್ತು ಕೆಲವೆಡೆ ಹೆಚ್ಚಾಗಿದೆ ಎನ್ನುವ ಭಾವನೆಯೂ ಮೂಡುತ್ತದೆ. ರಾಮನ ವ್ಯಕ್ತಿತ್ವದಷ್ಟೇ ರಾವಣನ ವ್ಯಕ್ತಿತ್ವವನ್ನೂ ವಿಜೃಂಭಿಸುವ ಪ್ರಯತ್ನ ಚಿತ್ರದಲ್ಲಿ ಸ್ಪಷ್ಟವಾಗಿ ಕಾಣುತ್ತದೆ.

ರಾಮನಾಗಿ ರಣಬೀರ್; ಪಾತ್ರದ ಗಾಂಭೀರ್ಯಕ್ಕೆ ಮೆರುಗು!
ರಣಬೀರ್ ಕಪೂರ್ ಅವರ ಅಭಿನಯ ಚಿತ್ರದ ಪ್ರಮುಖ ಶಕ್ತಿಗಳಲ್ಲೊಂದು. ಶ್ರೀರಾಮನ ಪಾತ್ರಕ್ಕೆ ಬೇಕಾದ ಗಾಂಭೀರ್ಯ, ಸೌಮ್ಯತೆ, ತಾಳ್ಮೆ, ನಡವಳಿಕೆ ಮತ್ತು ಭಾವನಾತ್ಮಕ ಅಭಿವ್ಯಕ್ತಿಯನ್ನು ಅವರು ಬಹಳ ಅಚ್ಚುಕಟ್ಟಾಗಿ ಕಟ್ಟಿಕೊಟ್ಟಿದ್ದಾರೆ.
ರಾಮನ ಪಾತ್ರವನ್ನು ಕೇವಲ ನಾಯಕನ ಪಾತ್ರದಂತೆ ನಿರ್ವಹಿಸದೆ, ಅದರ ಘನತೆ ಮತ್ತು ಮೌಲ್ಯಗಳನ್ನು ಅರಿತು ಅಭಿನಯಿಸಿರುವುದು ಗಮನ ಸೆಳೆಯುತ್ತದೆ. ಅವರ ಮುಖಭಾವ, ಮಾತಿನ ಶೈಲಿ, ದೇಹಭಾಷೆ ಮತ್ತು ಪಾತ್ರದೊಳಗೆ ತಲ್ಲೀನರಾಗಿರುವ ರೀತಿ ಶ್ರೀರಾಮನ ವ್ಯಕ್ತಿತ್ವಕ್ಕೆ ಗೌರವ ತರುವಂತಿದೆ.
ಒಂದು ಮಹಾಕಾವ್ಯದ ಪ್ರಮುಖ ಪಾತ್ರವನ್ನು ನಿರ್ವಹಿಸುವಾಗ ಕಲಾವಿದನ ಮೇಲೆ ಇರುವ ಜವಾಬ್ದಾರಿ ದೊಡ್ಡದು. ಆ ಜವಾಬ್ದಾರಿಯನ್ನು ರಣಬೀರ್ ಸಮರ್ಥವಾಗಿ ನಿಭಾಯಿಸಿದ್ದಾರೆ.

ಸೀತೆಯಾಗಿ ಸಾಯಿ ಪಲ್ಲವಿ; ಸಹಜ ಅಭಿನಯದ ಸೊಗಡು!
ಸೀತೆಯ ಪಾತ್ರದಲ್ಲಿ ಸಾಯಿ ಪಲ್ಲವಿ ತಮ್ಮ ಸಹಜ ಅಭಿನಯದ ಮೂಲಕ ಗಮನ ಸೆಳೆಯುತ್ತಾರೆ. ಪಾತ್ರದಲ್ಲಿನ ಮುಗ್ಧತೆ, ಅಮಾಯಕತೆ, ಪವಿತ್ರತೆ, ಪ್ರೀತಿ ಮತ್ತು ಪತಿಯ ಮೇಲಿನ ಭಾವನಾತ್ಮಕ ಬಾಂಧವ್ಯವನ್ನು ಬಹಳ ಸಹಜವಾಗಿ ಅಭಿವ್ಯಕ್ತಿಸಿದ್ದಾರೆ.
ಸೀತೆಯ ಪಾತ್ರಕ್ಕೆ ಬೇಕಾದ ಮೃದುತ್ವದ ಜೊತೆಗೆ ಅಗತ್ಯವಿರುವ ಆತ್ಮಸ್ಥೈರ್ಯವನ್ನೂ ತಮ್ಮ ಅಭಿನಯದಲ್ಲಿ ತೋರಿಸಿದ್ದಾರೆ. ಅತಿಯಾದ ನಾಟಕೀಯತೆ ಇಲ್ಲದೆ ಭಾವನೆಗಳನ್ನು ಪ್ರೇಕ್ಷಕರಿಗೆ ತಲುಪಿಸುವ ಅವರ ಶೈಲಿ ಮೆಚ್ಚುಗೆಗೆ ಪಾತ್ರವಾಗುತ್ತದೆ.

ಸಾಯಿ ಪಲ್ಲವಿ ಅವರ ನೈಜ ಅಭಿನಯ ಈ ಪಾತ್ರವನ್ನು ಮತ್ತಷ್ಟು ಆಪ್ತವಾಗಿಸುತ್ತದೆ.
ಯಶ್ ಎಂದರೆ ರಾವಣನ ಹತ್ತು ಮುಖಗಳ ಆರ್ಭಟ!
ಈ ಚಿತ್ರದ ಬಗ್ಗೆ ಕನ್ನಡಿಗರಲ್ಲಿ ವಿಶೇಷ ಕುತೂಹಲ ಮೂಡಿಸಿರುವುದು ಯಶ್ ಅವರ ರಾವಣನ ಪಾತ್ರ. ತೆರೆಯ ಮೇಲೆ ಯಶ್ ಕಾಣಿಸಿಕೊಳ್ಳುವ ಪ್ರತಿಯೊಂದು ಸಂದರ್ಭದಲ್ಲೂ ಅವರ ಪರದೆಯ ಮೇಲಿನ ಪ್ರಭಾವ ಪ್ರೇಕ್ಷಕರ ಗಮನ ಸೆಳೆಯುತ್ತದೆ.
ಆದರೆ ವಿಶೇಷವಾಗಿ ರಾವಣನ ಹತ್ತು ತಲೆಗಳ ವಿಭಿನ್ನ ಸ್ವರೂಪವನ್ನು ಹತ್ತು ವಿಭಿನ್ನ ಶೇಡ್‌ಗಳು ಮತ್ತು ಗೆಟಪ್‌ಗಳ ಮೂಲಕ ಕಟ್ಟಿಕೊಟ್ಟಿರುವ ದೃಶ್ಯ ನಿಜಕ್ಕೂ

ಚಿತ್ರದ ಗಮನಾರ್ಹ ಕ್ಷಣ.
ಆ ದೃಶ್ಯ ಕೆಲವೇ ಸೆಕೆಂಡುಗಳ ಅವಧಿಯಲ್ಲಿ ಮೂಡಿಬಂದರೂ ಅದರ ಹಿಂದಿನ ಕಲ್ಪನೆ, ನಿರ್ದೇಶನ ಮತ್ತು ಯಶ್ ಅವರ ಅಭಿನಯ ಪ್ರೇಕ್ಷಕರ ಮನಸ್ಸಿನಲ್ಲಿ ಗಾಢವಾಗಿ ಉಳಿಯುತ್ತದೆ. ಹತ್ತು ಮುಖಗಳಿಗೂ ವಿಭಿನ್ನ ವ್ಯಕ್ತಿತ್ವದ ಛಾಯೆ ನೀಡಿರುವ ರೀತಿ ವಿಶೇಷ.
ಆ ಕೆಲವು ಕ್ಷಣಗಳಲ್ಲಿ ಯಶ್ ತಮ್ಮ ಅಭಿನಯದ ಸಾಮರ್ಥ್ಯವನ್ನು ಮತ್ತೊಮ್ಮೆ ಸಾಬೀತುಪಡಿಸುತ್ತಾರೆ. ಯಾವುದೇ ರೀತಿಯ ಪಾತ್ರವನ್ನು ನೀಡಿದರೂ ಅದಕ್ಕೆ ತಮ್ಮದೇ ಆದ ಛಾಪು ಮೂಡಿಸಬಲ್ಲ ನಟ ಎನ್ನುವುದಕ್ಕೆ ಈ ರಾವಣನ ಪಾತ್ರ ಮತ್ತೊಂದು ಉದಾಹರಣೆ.
ಚಿತ್ರದಲ್ಲಿ ರಾವಣನ ಆರ್ಭಟಕ್ಕೆ ಹೆಚ್ಚಿನ ಅವಕಾಶ ನೀಡಿರುವುದರಿಂದ ಯಶ್ ಅವರ ಪಾತ್ರ ಪ್ರೇಕ್ಷಕರನ್ನು ಹಿಡಿದಿಟ್ಟುಕೊಳ್ಳುತ್ತದೆ. ಅವರ ಅಭಿನಯ, ಪರದೆಯ ಮೇಲಿನ ಗಾಂಭೀರ್ಯ ಮತ್ತು ಪಾತ್ರದ ವಿಭಿನ್ನ ಆಯಾಮಗಳು ಚಿತ್ರಕ್ಕೆ ವಿಶೇಷ ಆಕರ್ಷಣೆ ನೀಡಿವೆ.

ಅಯೋಧ್ಯೆಯ ದಶರಥನ ಅರಮನೆ, ರಾವಣನ ಲಂಕೆಯ ಸಾಮ್ರಾಜ್ಯ ಮತ್ತು ಸೀತೆಯ ಮಿಥಿಲೆಯ ವೈಭವವನ್ನು ತಂತ್ರಜ್ಞಾನದ ಮೂಲಕ ಅದ್ದೂರಿಯಾಗಿ ಕಟ್ಟಿಕೊಡಲಾಗಿದೆ.
ಪ್ರತಿಯೊಂದು ಸಾಮ್ರಾಜ್ಯದ ವಾಸ್ತುಶಿಲ್ಪ, ಪರಿಸರ, ಅರಮನೆಯ ವಿನ್ಯಾಸ ಮತ್ತು ದೃಶ್ಯ ಸಂಯೋಜನೆಗಳು ಚಿತ್ರಕ್ಕೆ ದೊಡ್ಡ ಮಟ್ಟದ ದೃಶ್ಯ ವೈಭವ ನೀಡುತ್ತವೆ.
ವಿಶೇಷ ದೃಶ್ಯ ಪರಿಣಾಮಗಳ ಬಳಕೆ ಹಲವು ಕಡೆಗಳಲ್ಲಿ ಉತ್ತಮ ಅನುಭವ ನೀಡುತ್ತದೆ. ಕೆಲವು ಸನ್ನಿವೇಶಗಳಲ್ಲಿ ಕಲ್ಪನೆಗೂ ಮೀರಿದ ದೃಶ್ಯಗಳನ್ನು ತೆರೆಮೇಲೆ ಕಟ್ಟಿಕೊಟ್ಟಿದ್ದಾರೆ.

ಆದರೆ ಎಲ್ಲೆಡೆ ತಂತ್ರಜ್ಞಾನದ ಬಳಕೆ ಅಷ್ಟೇ ಪರಿಣಾಮಕಾರಿಯಾಗಿಲ್ಲ. ಕೆಲವು ಕಡೆಗಳಲ್ಲಿ ಅವಶ್ಯಕತೆಗಿಂತ ಹೆಚ್ಚಾಗಿ ದೃಶ್ಯ ವೈಭವಕ್ಕೆ ಒತ್ತು ನೀಡಿರುವ ಭಾವನೆ ಮೂಡುತ್ತದೆ.
ತಂತ್ರಜ್ಞಾನ ಕಥೆಗೆ ಪೂರಕವಾಗಿರಬೇಕೇ ಹೊರತು ಕಥೆಯನ್ನೇ ಮೀರಿಸುವಂತಾಗಬಾರದು. ಈ ಚಿತ್ರದಲ್ಲಿ ಕೆಲವು ಸಂದರ್ಭಗಳಲ್ಲಿ ಆ ಮಿತಿಯನ್ನು ಮೀರುವ ಪ್ರಯತ್ನ ಕಂಡುಬರುತ್ತದೆ.
ಜಟಾಯು–ರಾವಣನ ಕಾಳಗ; ಮೈನವಿರೇಳಿಸುವ ದೃಶ್ಯ!
ಚಿತ್ರದ ಅತ್ಯಂತ ಗಮನಾರ್ಹ ಮತ್ತು ಮನಸ್ಸಿನಲ್ಲಿ ಉಳಿಯುವ ಸನ್ನಿವೇಶಗಳ ಬಗ್ಗೆ ಹೇಳುವುದಾದರೆ ಜಟಾಯು ಮತ್ತು ರಾವಣನ ನಡುವಿನ ಹೋರಾಟಕ್ಕೆ ವಿಶೇಷ ಸ್ಥಾನ ನೀಡಲೇಬೇಕು.
ಚಿಕ್ಕಂದಿನಿಂದ ಕಥೆಗಳಲ್ಲಿ ಕೇಳಿಕೊಂಡು, ಪುಸ್ತಕಗಳಲ್ಲಿ ಓದಿಕೊಂಡು, ಧಾರಾವಾಹಿಗಳಲ್ಲಿ ಹಾಗೂ ವಿವಿಧ ಸಿನಿಮಾಗಳಲ್ಲಿ ನೋಡಿಕೊಂಡು ಬಂದಿರುವ ಜಟಾಯು–ರಾವಣನ ಸಂಘರ್ಷವನ್ನು ಇಲ್ಲಿ ನಿರ್ದೇಶಕರು ವಿಭಿನ್ನ ಕಲ್ಪನೆಯೊಂದಿಗೆ ಕಟ್ಟಿಕೊಟ್ಟಿದ್ದಾರೆ.
ಜಟಾಯುವಿನ ಶೌರ್ಯ, ಸೀತೆಯನ್ನು ರಕ್ಷಿಸಲು ಆತ ನಡೆಸುವ ಹೋರಾಟ ಮತ್ತು ರಾವಣನ ಪ್ರಬಲ ಪ್ರತಿರೋಧವನ್ನು ತಂತ್ರಜ್ಞಾನ ಹಾಗೂ ದೃಶ್ಯ ಸಂಯೋಜನೆಯ ಮೂಲಕ ಪರಿಣಾಮಕಾರಿಯಾಗಿ ತೋರಿಸಿದ್ದಾರೆ.
ಈ ದೃಶ್ಯವನ್ನು ನೋಡುತ್ತಿದ್ದಾಗ ಇಷ್ಟು ದಿನ ಕಲ್ಪಿಸಿಕೊಂಡಿದ್ದ ಹೋರಾಟಕ್ಕೂ ಮೀರಿದ ರೀತಿಯಲ್ಲಿ ಇದನ್ನು ತೆರೆಮೇಲೆ ಕಟ್ಟಿಕೊಡಬಹುದೇ ಎಂಬ ಅಚ್ಚರಿ ಮೂಡುತ್ತದೆ.
ರಾಮನ ಯುದ್ಧದ ಸನ್ನಿವೇಶಗಳು, ರಾವಣನ ಆರ್ಭಟ ಮತ್ತು ದೇವತೆಗಳ ಪ್ರಸಂಗಗಳು ಒಂದೆಡೆಯಾದರೆ ಜಟಾಯು–ರಾವಣನ ಕಾಳಗ ತನ್ನದೇ ಆದ ಪ್ರಭಾವ ಬೀರುತ್ತದೆ. ಚಿತ್ರದ ಪ್ರಮುಖ ಆಕರ್ಷಣೆಗಳಲ್ಲಿ ಇದೂ ಒಂದು.
ನಿರೂಪಣೆಯಲ್ಲಿ ವೇಗವಿದ್ದಿದ್ದರೆ ಇನ್ನಷ್ಟು ಪರಿಣಾಮಕಾರಿ!
ಚಿತ್ರದ ಕಥೆ ಮತ್ತು ದೃಶ್ಯ ವೈಭವದ ನಡುವೆ ಕೆಲವು ಸನ್ನಿವೇಶಗಳು ನಿಧಾನಗತಿಯಲ್ಲಿ ಸಾಗುತ್ತವೆ. ಅವುಗಳನ್ನು ಕೊಂಚ ಚುರುಕುಗೊಳಿಸಿದ್ದರೆ ಚಿತ್ರದ ನಿರೂಪಣೆ ಇನ್ನಷ್ಟು ಹಿಡಿತ ಸಾಧಿಸುತ್ತಿತ್ತು.
ವಿಶೇಷವಾಗಿ ದಶರಥನ ಮರಣದಂತಹ ಭಾವನಾತ್ಮಕವಾಗಿ ಮಹತ್ವದ ಸನ್ನಿವೇಶಕ್ಕೆ ಇನ್ನಷ್ಟು ಸಮಯ ಮತ್ತು ಆಳ ನೀಡಬಹುದಿತ್ತು. ಕೆಲವು ನಿಧಾನಗತಿಯ ದೃಶ್ಯಗಳ ಅವಧಿಯನ್ನು ಕಡಿಮೆ ಮಾಡಿ, ಇಂತಹ ಪ್ರಮುಖ ಭಾವನಾತ್ಮಕ ಕ್ಷಣಗಳನ್ನು ವಿಸ್ತರಿಸಿದ್ದರೆ ಪ್ರೇಕ್ಷಕರ ಮನಸ್ಸಿಗೆ ಹೆಚ್ಚು ಆಪ್ತವಾಗುತ್ತಿತ್ತು.
ಇಲ್ಲಿ ನಿರ್ದೇಶಕರು ಗಮನಿಸಬೇಕಾಗಿದ್ದದ್ದು ಕೇವಲ ದೃಶ್ಯಗಳ ಅದ್ದೂರಿಯಲ್ಲ, ಕಥೆಯ ಭಾವನಾತ್ಮಕ ತೂಕವೂ ಹೌದು.
ಮೊದಲ ಭಾಗ ಮುಗಿಯಿತು; ಇನ್ನೂ ಹಲವು ಪ್ರಮುಖ ಪ್ರಸಂಗಗಳು ಬಾಕಿ!
ಚಿತ್ರದ ಅಂತ್ಯ ಪ್ರೇಕ್ಷಕರಿಗೆ ಅಚ್ಚರಿಯ ಜೊತೆಗೆ ಸ್ವಲ್ಪ ನಿರಾಸೆಯನ್ನೂ ನೀಡುತ್ತದೆ. ಕಾರಣ, ಇದು ರಾಮಾಯಣದ ಮೊದಲ ಭಾಗ ಮಾತ್ರ.
ಇನ್ನೂ ಆಂಜನೇಯನ ಪ್ರಮುಖ ಪ್ರವೇಶವಾಗಿಲ್ಲ. ರಾಮ ಮತ್ತು ರಾವಣ ಮುಖಾಮುಖಿಯಾಗಿಲ್ಲ. ಸುಗ್ರೀವ, ವಾಲಿ, ವಿಭೀಷಣ ಹಾಗೂ ಸೀತೆಯ ಅನ್ವೇಷಣೆಯ ಪ್ರಮುಖ ಪ್ರಸಂಗಗಳು ಮುಂದಿನ ಭಾಗಕ್ಕೆ ಉಳಿದಿವೆ.
ಸೀತೆಯನ್ನು ಹುಡುಕಿಕೊಂಡು ಹನುಮಂತ ಲಂಕೆಗೆ ತೆರಳುವ ಸನ್ನಿವೇಶ, ರಾವಣನ ಸಾಮ್ರಾಜ್ಯದಲ್ಲಿ ನಡೆಯುವ ಘಟನೆಗಳು, ರಾಮ–ರಾವಣರ ಮಹಾಯುದ್ಧ, ರಾಕ್ಷಸರ ಸಂಹಾರ, ವಿಭೀಷಣನಿಗೆ ಪಟ್ಟಾಭಿಷೇಕ ಮತ್ತು ಸೀತೆಯನ್ನು ಮರಳಿ ಕರೆತರುವ ಮಹತ್ವದ ಪ್ರಸಂಗಗಳೆಲ್ಲವೂ ಮುಂದಿನ ಭಾಗದಲ್ಲಿ ಮೂಡಿಬರಲಿವೆ.
ಚಿತ್ರದ ಅಂತ್ಯದಲ್ಲಿ ಎರಡನೇ ಭಾಗವು 2028ರ ದೀಪಾವಳಿಗೆ ಬಿಡುಗಡೆಯಾಗಲಿದೆ ಎಂಬ ಘೋಷಣೆಯೊಂದಿಗೆ ಮೊದಲ ಭಾಗ ಮುಕ್ತಾಯವಾಗುತ್ತದೆ.
ಇಷ್ಟು ಹೊತ್ತು ಕುತೂಹಲದಿಂದ ಸಿನಿಮಾ ನೋಡುತ್ತಿದ್ದ ಪ್ರೇಕ್ಷಕನಿಗೆ ಕಥೆ ಅರ್ಧದಲ್ಲೇ ನಿಂತುಹೋಯಿತಲ್ಲ ಎಂಬ ಭಾವನೆ ಮೂಡುವುದು ಸಹಜ. ಅದೇ ಸಮಯದಲ್ಲಿ ಮುಂದಿನ ಭಾಗದಲ್ಲಿ ಏನೆಲ್ಲಾ ಅದ್ದೂರಿ ಪ್ರಸಂಗಗಳು ಎದುರಾಗಲಿವೆ ಎಂಬ ನಿರೀಕ್ಷೆಯೂ ಹೆಚ್ಚುತ್ತದೆ.
ಒಟ್ಟಾರೆ ಮಾತು
ಪರಿಚಿತ ಕಥೆಯನ್ನು ಮತ್ತೊಮ್ಮೆ ಹೇಳುವುದು ಸುಲಭದ ಕೆಲಸವಲ್ಲ. ಅದರಲ್ಲೂ ಕೋಟ್ಯಂತರ ಜನರ ಧಾರ್ಮಿಕ ನಂಬಿಕೆ ಮತ್ತು ಭಾವನೆಗಳೊಂದಿಗೆ ಬೆಸೆದುಕೊಂಡಿರುವ ರಾಮಾಯಣವನ್ನು ಸಿನಿಮಾ ರೂಪದಲ್ಲಿ ಕಟ್ಟಿಕೊಡುವಾಗ ನಿರ್ದೇಶಕನ ಜವಾಬ್ದಾರಿ ಇನ್ನಷ್ಟು ಹೆಚ್ಚಾಗುತ್ತದೆ.
ನಿತೇಶ್ ತಿವಾರಿ ಈ ಸವಾಲನ್ನು ಸ್ವೀಕರಿಸಿ, ಹೊಸ ಕಲ್ಪನೆಗಳು, ಪಾತ್ರಗಳ ಹಿನ್ನೆಲೆ, ಅದ್ದೂರಿ ತಂತ್ರಜ್ಞಾನ ಮತ್ತು ವಾಣಿಜ್ಯ ಅಂಶಗಳನ್ನು ಬೆರೆಸಿ ಮೊದಲ ಭಾಗವನ್ನು ರೂಪಿಸಿದ್ದಾರೆ.
ರಾಮನ ಕಥೆ ಎಲ್ಲರಿಗೂ ಗೊತ್ತು. ಆದರೆ ಈ ಬಾರಿ ರಾವಣನ ಹಿಂದಿನ ಬದುಕಿಗೂ ಹೆಚ್ಚಿನ ಜಾಗ ನೀಡಿ, ರಾಮಾಯಣವನ್ನು ಮತ್ತೊಂದು ದೃಷ್ಟಿಕೋನದಲ್ಲಿ ಹೇಳುವ ಪ್ರಯತ್ನ ಮಾಡಿರುವುದು ಚಿತ್ರದ ವಿಶೇಷ.
ಮೊದಲ ಭಾಗದಲ್ಲಿ ರಾವಣನ ಆರ್ಭಟಕ್ಕೆ ಸಾಕಷ್ಟು ಜಾಗ ಸಿಕ್ಕಿದೆ. ಇನ್ನೂ ರಾಮನ ಪರಾಕ್ರಮ, ಹನುಮಂತನ ಭಕ್ತಿ ಮತ್ತು ರಾಮ–ರಾವಣರ ಮಹಾಸಂಗ್ರಾಮವನ್ನು ನೋಡಲು ಎರಡನೇ ಭಾಗದವರೆಗೆ ಕಾಯಲೇಬೇಕು.
ಒಂದು ಮಹಾಕಾವ್ಯದ ಮೊದಲ ಅಧ್ಯಾಯ ತೆರೆಮೇಲೆ ಮುಗಿದಿದೆ. ಆದರೆ ಪ್ರೇಕ್ಷಕರ ಮನಸ್ಸಿನಲ್ಲಿ ಎರಡನೇ ಅಧ್ಯಾಯದ ಕುತೂಹಲ ಈಗಾಗಲೇ ಆರಂಭವಾಗಿದೆ!.

ವಿಮರ್ಶೆ: ಮಂಜುರಾಜ್ ಸೂರ್ಯ